Güncel

Ukrainada AHIT Nezaret Eticileri İle Qırım Mevzusı Muzakere Etildi

2018 senesi arman (avgust) ayı 15 künü Ukraina Prezidentiniñ Qırım MC Daimiy Temsilcisi Borıs Babin ve halqara alâqalar hızmetiniñ baş mesleatçısı Taisiya Tkaçenko, Ukrainada AHIT Mahsus nezaret etici missiyasınıñ Herson vilâyetindeki nezaret eticileri Piter Çilvers ve İrena Ballesteros ile körüşip, Temsilcilikniñ vekâletleri çerçivesinde Qırım mevzusını muzakere ettiler.

Körüşüv esnasında Rusiye Federatsıyasınıñ akimiyeti tarafından muntazam şekilde halqara uquqnıñ bozuluvı, bu cümleden, Azaq deñizinde ticariy gemicilik saasında Mariupol ve Berdânsk limanlarina areket etken gemiler Keriç boğazından keçken arada olarnıñ RF FSB hızmetçileri tarafından esassız toqtatıluvı ve nezaret etilüvi meseleleri aydınlatıldı, böyleliknen, ukrain deñiz limanlarınıñ aqları bozula ve neticede deñiz ablukası alâmetlerini taşığan areketler yüklerni ketirüv müddetleri bozulğanı içün ukrain limanlarnı ciddiy para masraflarına ketirmekte. Qara deñizde balıq avı ile oğraşqan ‘‘ЯМК-0041’’ ukrain balıqçı gemisini qanunsız alda yaqalağan ve üç ay devamında onıñ taqımınıñ beş azasını qanunsız alda reine olaraq vaqtınca işğal etilgen Qırımda tutqan işğalcı RF akimiyeti halqara uquqnıñ şartlarını körmemezlikke urğanı da ayrıca muzakere etildi.

Daimiy Temsilci Qırımnı suv ile temin etüvniñ problemli meselelerine, bu cümleden, artezian suvlarınıñ kütleviy şekilde RF arbiy-sanayı kompleksine hızmet etken himiya sanayısı şirketleriniñ tehnikiy ihtiyaçlarına işletilüvine ayrıca diqqat çekti. Qırım resurslarını böyle vahşıyca çaypav yeraltı suvlarınıñ seviyesini tüşürip, topraqlarnı tuzlata ve işğal etilgen yarımadada bereketni ve koy hocalığınıñ kârlılığını tüşüre.

Qırımnıñ kütleviy şekilde arbiyleştirilüvi, abiy obyeklerniñ ve infrastrukturanıñ acele şekilde inkişaf etilüvi, yarımadanıñ tamamen arbiy bazağa çevirilüvi şaraitlerinde işğalcı devlet Qırım ealisiniñ kerçek içtimaiy-iqtisadiy vaziyeti ile meraqlanmağanı qayd etildi. AHIT MNM vekilleriniñ teşebbüsi ile iştilâcı devletke hızmet etken işğalcı akimiyetiniñ areketlerini takbih etmek ve onı mesüliyetke çekmek maqsadınen Ukraina tarafından devlet ve halqara seviyede yapılğan areketler, hususan İnsan aqları boyunca Avropa mahkemesinde Ukraina Rusiyege qarşı açqan davalar muzakere etildi. Körüşüv devamında Qırım meseleleri ile oğraşqan mahkeme ve uquq qorçalav organlarnıñ kündelik faaliyetleri ve ameliy neticeleri da muzakere etildi.

Menba : Ukraina Prezidentiniñ Qırım MC Daimiy Temsilciliği Resmi Saytı

Kırım'ın Sesi Gazetesi

27 Şubat 2015 Tarihinde hizmet bermege başlağan www.kiriminsesigazetesi.com maqsadı akkında açıklama yapqan Mustafa Sarıkamış İsmail Bey Gaspıralı’nıñ bu büyük mirasına sahip çıqmaq ve onun emellerini yaşatmaqtır. Qırımtatar Türkleriniñ ananevî, körenek, ürf, adet kibi yaşamlarında ne bar ise objektif şekilde Dünya cemiyetine taqdim etilmektir.

Pin It on Pinterest