Qırımda Kelinler Mektebi Kursları Açıla
Qırım ve Sevastopol şeeri müsulmanları Diniy idaresiniñ “Faydalı ilim” leyhası kelecekte kelinler olacaq qızlar içün “Kelinler mektebi” adlı kurslarnı aça.
Teşkilâtçılarnıñ sözlerine köre, “Kelinler mektebi” kursı ömür yoldaşını qıdırğan, evlilikke azırlanğan, İslâmda ve ruhiyatşınaslıqta qoranta munasebetlerinen meraqlanğanlar içün çalışacaq. Bundan da ğayrı, kursnıñ programmasında qoranta azalarınıñ vazifeleri, ömür arqadaşı ve onıñ soylarınen munasebetlerniñ qurulması ve ömür yoldaşını seçkende, hata yapmamaq içün tevsiyeler berilecek. Kursnıñ programmasında nevbetteki mevzular baqılacaq:
- Ömür arqadaşınıñ seçilüvi – stereotipler, tahminler, şübe gruppası, ömür arqandaşlarınıñ musaviyligi aqqında.
- Evlilikten evel kelecek ömür arqadaşları arasındaki munasebet: başlanuvı, erkekniñ bahşışlarına nisbeten nasıl etip davranmaq, munasebetlerde elâl ve haramnıñ sıñırı.
- İslâmda söz kesimi ve evlilik teklifi adetleri. Toy, nikâh, şartlar.
- Evlenüvniñ birinci gecesi ve ömür arqadaşlarınıñ gizli munasebetleri.
- Ömür yoldaşınıñ soy-sopları ile munasebetler. Aqay ve apay vazifeleri
- Apaynıñ ömür arqadaşı olaraq baş rolü. Bahtlı qoranta yaşayışınıñ algoritmi.
- İslâmda ayırıluvnıñ çeşitleri.
Kurs mart 27 künü 2019 senesi başlanacaq. Lektsiyalar Aqmescit ş., pr-t Pobedı, 128 adresi boyunca keçirilecek. Bedava degil. Kursqa @faydali_ilim direktinde yazılıp, qoşulmaq mümkün.
QMDİ MDT matbuat hızmeti
