Qırım Müftisi Hacı Emirali Ablayev, Yañı Zelandiya müsulmanlarnıñ yaqınlarına taziye bildirdi.
Qırım Müftisi hacı Emirali Ablayev, bugün, martnıñ 15-de, Yañı Zelandiyada yüz bergen terakt neticesinde elâk olğan müsulmanlarnıñ yaqınlarına taziye bildirdi.
Müfti: “Qırım müsulmanları işbu teraktnı takbih eteler. Qabaatsız insanlarnıñ öldürüvi – büyük günahtır. Quran-ı Kerimde, qabatsız kimseni öldürgen – bütün insaniyetlikni öldürgen kibidir, dep aytıla. Bir de bir insan, Allahqa qarşılıq köstererek, biriniñ canını almaq qarar bergen olsa, nefsine uyğan sayılır ve er angi birini öldürmek azırdır, demek. Aynı bu sebepten, bütün insanlarnıñ öldürüvi günahını qazanğan sayıla.
Qırım müsulmanları bu facia neticesinde qazalanğanlarğa sabır tilep, yaqınlarını coyğanlarğa teren taziye bildirmekte”, dep qayd etti.
Bugün, Kraysçerçniñ (Yañı Zelandiya) eki camisinde atış olıp keçti. Politsiya 49 elâk olğan insan aqqında haber bere. Basqınğa ait olmaq şübesi altında bulunğan 4 adam yaqalandı.
