BİR SARAY QURACAQMAN!
BİR SARAY QURACAQMAN!
Bekir Çobanzade
Bir saray quracaqman!.. Han bolmasın içinde,
Qul, ırgat, açlıq, horluq, qan bolmasın içinde…
Taşını yat ellerden ketirtmem iç,
Cetişir öz curtumda çıqqan kerpiç…
Bek yüksek bolmasa da kök töbesi,
Temelli bolsun, aydınlıq er köşesi…
Penceresi keniş bolsun, kirsin ışıq,
Carlığa er qapusı bolsun açıq…
Kesmesin qıbla celin iç bir üyniñ,
Bolmasın qaraltısı felân biyniñ…
Bir saray quracaqman, han bolmasın içinde,
Qul, ırgat, açlıq, horluq, qan bolmasın içinde…
Cıyayım alt-üst etip catqan cerin,
O eski zor cigitler kemiklerin…
Bularman balçıqnı yoğurayım,
Er qabirge: “Kemik!” — dep bağırayım…
Şay etip izgüleşsin dört divarı,
Çeşmesi, çeçekleri, keñ azbarı…
Taptama izgü cerni endi işsiz,
Sal saray, qur devletiñ — bolsun eşsiz…
Bir saray quracaqman, taş bolmasın içinde,
Ep kemik, ep can bolsun, caş solmasın içinde,
Aç bolmasın içinde…
22 mayıs, 1920, Lozan.
БИР САРАЙ КЪУРАДЖАКЪМАН!.
Бир сарай къураджакъман!.. Хан болмасын ичинде,
Къул, ыргьат, ачлыкъ, хорлукъ, къан болмасын ичинде…
Ташыны ят эллерден кетиртмем ич,
Джетишир озь джуртумда чыкъкъан керпич…
Бек юксек болмаса да кок тёбеси,
Темелли болсун, айдынлыкъ эр кошеси…
Пенджереси кениш болсун, кирсин ышыкъ,
Джарлыгъа эр къапусы болсун ачыкъ…
Кесмесин къыбла джелин ич бир уйнинъ,
Болмасын къаралтысы фелян бийнинъ…
Бир сарай къураджакъман, хан болмасын ичинде,
Къул, ыргьат, ачлыкъ, хорлукъ, къан болмасын ичинде…
Джыяйым алт-усть этип джаткъан джерин,
О эски зор джигитлер кемиклерин…
Буларман балчыкъны ёгъурайым,
Эр къабирге: «Кемик!» — деп багъырайым…
Шай этип изгюлешсин дёрт дивары,
Чешмеси, чечеклери, кенъ азбары…
Таптама изгю джерни энди ишсиз,
Сал сарай, къур девлетинъ — болсун эшсиз…
Бир сарай къураджакъман, таш болмасын ичинде,
Эп кемик, эп джан болсун, джаш солмасын ичинде,
Ач болмасын ичинде…
22 майыс, 1920, Лозан.
